திராவிட் விலகல் !

இந்திய க்ரிக்கெட் அணி தலைவர் பதவியிலிருந்து விலகுவதாக ராகுல் திராவிட் இந்திய க்ரிக்கெட் கட்டுப்பாட்டு வாரியத்திடம் தெரிவித்துள்ளார். தனது ஆட்டத்தில் கவனம் செலுத்த விரும்புவதால் இந்த முடிவை எடுத்ததாக அவர் கூறியுள்ளார். ஆஸ்திரேலியாவுடனான ஒருநாள் போட்டித்தொடர் இரண்டு வாரங்களில் தொடங்க உள்ள நிலையில் விரைவாக வேறொரு அணித்தலைவரை தேர்ந்தெடுக்க உள்ள கட்டாயத்தில் வாரியம் உள்ளது. தோனிக்கு அதிக அனுபவமில்லாததால் சச்சின் மீண்டும் பொறுப்பேற்கலாம். இளைஞர்களிடம் வாய்ப்பைக் கொடுக்க விரும்பினால் யுவராஜ் கூட தேர்ந்தெடுக்கப் படலாம்.

எது நடந்தாலும் கடந்த சில மாதங்களாகவே அவருக்கு எதிராக பல புகைச்சல்கள். சேப்பல் போகிற போக்கில் திராவிடை மற்ற மூத்த அணி வீரர்கள் மதிப்பதில்லை என்றும் தன்னிச்சையாக அவர் முடிவு எடுக்க முடிவதில்லை என்றும் செய்தி வெளியிட்டார். T20 உலகக் கோப்பையில் மூத்த வீரர்களை ஆட வேண்டாம் என்று திராவிட்தான் சொன்னதாகவும் அதை அவர்களைக் கேட்காமலே வாரியத்திடம் தெரிவித்து விட்டார் என்றும் புகார்கள் எழுந்தன. இங்கிலாந்து தொடரில் மூன்றாவது டெஸ்டின் போது பாலோ ஆன் கொடுக்காததை கடுமையாக விமர்சனம் செய்தனர். அவருடைய அணியில் விளையாடிய ஜாகிர் கானே நாங்கள் களைப்படையவில்லை பாலோ ஆன் கொடுத்திருந்தால் வென்றிருப்போம் என்று அணித்தலைவரின் கருத்துக்கு நேர்மாறாக கூறினார். அதைத் தொடர்ந்த ஒருநாள் போட்டியிலும் திராவிட் ஒன் டவுன் ஆக இறங்காததை தேர்வுக்கமிட்டித் தலைவர் வெங்சர்க்கார் விமர்சனம் செய்தார். ஆக All is Not Well என்றாகி கடைசியில் ராஜினாமாவில் முடிந்தது.

வர வர இந்திய க்ரிக்கெட்டில் நடக்கும் மாற்றங்கள் ஆட்டத்தை விட சுவாரஸ்யமாக இருக்கிறது

வெற்றிக் கொடி நாட்டியது இந்தியா

க்ரிக்கெட்டில் இங்கிலாந்திடம் இறுதிப் போட்டியில் வாங்கிய உதைக்கு மருந்தாக அமைந்தது ஹாக்கி ஆசியக் கோப்பையில் இந்தியா அடைந்த வெற்றி. என்னதான் போன முறை இந்தியா வென்றிருந்தாலும் இந்த முறை போட்டி கடுமையாக இருந்தது. ஒரு காலத்தில் இந்தியாவும் பாகிஸ்தானும் மட்டுமே கோலோச்சிய ஆசிய ஹாக்கியில் சில வருடங்களுக்கு முன்பாக கொரிய அணி முன்னிலை பெற்றது. கடந்த ஒரு வருடமாக மலேசியாவும், ஜப்பானும், சீனாவும் வலுவான அணிகளாக உருவெடுத்துள்ளன. சில மாதங்களாக நமது அணி ஆடிவரும் போட்டிகளில் சோபிக்காததால் எதிர்பார்ப்பும் அவ்வளவாக இல்லை.

ஆனால் அனைவரவது எதிர்பார்ப்புகளை மீறி இந்தியா தொடக்க முதலே மிக அபாரமாக விளையாடியது. க்ரிக்கெட்டில் எப்போதும் முழ்கிக் கிடக்கும் சென்னை மக்கள் முதலில் ஸ்டேடியங்களில் தலை காட்டாவிட்டாலும் பின் இந்தியா விளையாடிய விதத்தைப் பார்த்து விளையாட்டரங்கங்களை நிரப்பினர். 20 கோல்களைப் போட்டு இலங்கையை வீழ்த்திய ஆட்டம் வீரர்களின் தன்னம்பிக்கையை மேலும் உயர்த்தியது. அதே பிரிவில் உள்ள உலக அரங்கில் தலை சிறந்த அணியாக விளங்கும் கொரிய அணியை 3-2 என்ற விகிதத்தில் வீழ்த்தியது இந்தியா கோப்பையை வெல்லும் என்ற நம்பிக்கையை பலப்படுத்தியது. இறுதி போட்டியில் அதே கொரிய அணியிடம் மோதும் நிலை வந்ததும் ஆரம்பத்தில் இருந்தே விறுவிறுப்பாக விளையாடிய இந்திய அணி முதல் மூன்று நிமிடங்களுக்குள்ளாகவே தனது முதல் கோலைப் போட்டு முன்னேறியது. அடுத்த சில நிமிடங்களில் Penalty Stroke மூலம் அதை கொரியா சமன் செய்த போதிலும் மனம் தளராமல் அடுத்தடுத்து கோல்களைப் போட்டு 7-2 என்ற விகிதத்தில் மிகப் பெரும் வெற்றியைப் பெற்றது. ஒரு வலுவான அணியை இத்தனை பெரிய வித்தியாசத்தில் மிக அதிக நாட்களுக்குப் பிறகு அதுவும் இறுதி ஆட்டத்தில் இந்தியா வென்றது மேயர் ராதாகிருஷ்ணன் ஆட்டரங்கத்தில் நேற்று திரளாக கூடியிருந்த ரசிகர்களுக்கு பெரும் உற்சாகத்தை கொடுத்தது.

கொரிய அணி நேற்று இப்படிப்பட்ட களத்தாக்குதலை இந்தியாவிடமிருந்து எதிர்பார்க்கவில்லை எனலாம். மின்னல் வேகத் தாக்குதலின் மூலமும் எதிரணி வீரர்களை மார்க் செய்து முன்னேற விடாமல் செய்வதன் மூலமும் வெற்றிகளைக் குவிக்கும் கொரியாவின் ஆட்டமுறை நேற்று எடுபடவில்லை. நிதானமாகவும் சரியான பாஸ்கள் மூலமாகவும் கொரிய அணியின் தற்காப்பை இந்திய பலமுறை தகர்த்தது. குறிப்பிடத்தக்க விஷயம் என்ன வென்றால் பெனால்டி கார்னர் மூலம் ஒரு கோல் கூடப் போடப்படவில்லை நடுவரின் (சரியான) தீர்ப்பை எதிர்த்து ஒருமுறை கொரிய அணியின் பயிற்சியாளர் அணியை வெளியில் அழைத்ததன் மூலம் அவர்களின் frustration நன்கு வெளிப்பட்டது. இருமுறை அணியின் முக்கிய வீரர்கள் நடுவரால் வெளியேற்றப் பட்டபோதும் கட்டுக் கோப்பு குலையாமல் இந்தியா ஆடியது மிகச் சிறப்பாகும்.

இந்தியா இந்த வெற்றியின் மூலம் தனது சிறு தவறுகளைத் திருத்திக்கொண்டு மிக வலுவான யூரோப்பிய அணிகளை எதிர்த்து ஆட இப்போதிருந்தே திட்டமிடவேண்டும் யூரோப் அணியினர் ஹாக்கி ஆடும் விதம் ஆசிய முறைகளிலிருந்து மிகவும் வேறுபட்டது. ஜெர்மனி, நெதர்லாந்து ஆகிய அணிகளை வெல்ல 'பழகிக்கொள்ளா' விட்டால் உலக அளவில் பதக்கம் பெறுவது என்பது குதிரைக் கொம்புதான்.

இந்த வெற்றி இந்திய ஹாக்கியின் மற்றொரு பொற்காலத்திற்கு வழிவகுக்கும் என்று நம்புவோம்

யானை காதலியுடன் ஓட்டம் - போலீஸ் வலை (?!) வீச்சு

Truth is stranger than fiction என்று சொல்வது போல் உண்மை பல சமயங்களில் நம்பமுடியாததாக இருக்கும். அப்படிப் பட்ட ஒரு சம்பவம் கீழே

மேற்கு வங்க மாநிலத்தில் உள்ள ரானிகஞ்ச் நகரில் ஒலிம்பிக் சர்க்கஸ் கம்பெனி முகாமிட்டுள்ளது. இதில் பிரபலமானது யானைகள் நடத்தும் வித்தைகள். இந்நிலையில் காட்டு (ஆண்) யானை ஒன்று அந்த ஊருக்குள் புகுந்து அட்டகாசம் செய்து வந்தது. இது யானைகள் 'காதல்' செய்யும் காலமனதால் அது கட்டுக்குள் அடங்காமல் நேற்று காலை சர்க்கஸ் தடுப்புக்களை உடைத்து உள்ளே புகுந்தது. அங்கிருந்த நான்கு பெண் யானைகளில் சாவித்ரி என்ற யானை மீது தன் பார்வையைச் செலுத்தியது. இந்த நவீன சத்தியவானை பார்த்து மயங்கிய சாவித்ரியும் 'அண்ணலும் நோக்கினான் அவளும் நோக்கினாள்' கதையாக தன் பார்வையை செலுத்த, இரண்டும் சர்க்கஸில் இருந்து ஓட்டம் பிடித்தன. லவ்வர்ஸ் பார்க் எதுவும் தோதுப் படாததாலும், போலீஸ் ஸ்டேஷனில் சென்று கல்யாணம் செய்ய வழியில்லாததாலும், ஊருக்கு ஒதுக்குப் புறம் உள்ள ஒரு குளக்கரையின் அருகே தங்களது குடித்தனத்தையும் அமைத்துக் கொண்டன.

எல்லாக் காதலிலும் வழக்கமாக வருவதுபோல் இங்கு வில்லன்களாக முளைத்த சர்க்கஸ் கம்பெனியார் தங்களது யானையை தேடி திருப்பித் தரும்படி போலீஸில் புகார் கொடுத்துள்ளனர். போலீஸாரும் யானைகளை பிரிக்கும் முயற்சியில் (அய்யோ பாவம்!) தீவிரமாக ஈடுபட்டுள்ளனர்.

துக்ளக்கும் இந்திய கிரிக்கெட்டும்

துக்ளக் தர்பாரின் போது எப்படி வேடிக்கையான வேதனையை மக்கள் அனுபவித்தார்களோ, அதே வேதனையை இந்திய கிரிக்கெட் ரசிகர்கள் இப்போது அனுபவித்துக்கொண்டிருக்கிறார்கள். வெற்றி தோல்வி விளையாட்டில் சகஜம் என்று உலகக் கோப்பை தோல்வியை மறக்கலாம் என்று பார்த்தால், தவறுகளை சரி செய்கிறேன் பேர்வழி என்று போர்டு அடிக்கும் கூத்து தாங்கலைடா சாமி. மூத்த வீரர்கள் பலர் சொதப்பிய போதிலும் அதை கண்டுகொள்ளாமல் ஒட்டுமொத்த பழியையும் சாப்பல் மேல் போட்டு அவரை தூக்கினார்கள். சரி ஒரே அடியாக அவரை துரத்துவார்கள் என்று பார்த்தால் அகாதமிக்கு அவரை தலைவர் ஆக்குகிறோம் என்று அவருக்கும் சோப்பு போட்டுப் பார்த்தர்கள் (பின்னால் அவர் எழுதப் போகும் புத்தகத்தில் என்ன இருக்குமோ என்று பயமோ ?). அவர் ஆளை விட்டால் போதும் என்று ஆஸ்திரேலியாவில் செட்டில் ஆகி விட்டார்.

சரி அடுத்த கோச் ஆவது சரியான ஆளாக இருப்பாரோ என்று பார்த்தால் வங்க தேச கோச் டேவ் வாட்மோர் தான் சரியானவர் என்று கிரிக்கெட் போர்டு வாசலில் இருக்கும் நாய்க் குட்டி கூட சொன்னது. போர்டு நிர்வாகிகள் அனைவரும் டாக்காவுக்கு படையெடுத்து வாட்மோரிடம் மணிக்கணக்கில் பேச்சு வார்த்தை நடத்தினார்கள். அந்த சீரிஸில் அவர் வங்க தேசத்துக்கு கோச்சிங் தந்ததை விட இந்திய கோச்சாக மாற பேச்சு நடத்தியதே அதிகம் போல் இருந்தது. ஆச்சு, அவர் தான் கோச்சு என்று 4ம் தேதி அறிவிப்பார்கள் என்று பார்த்தால் அந்தர் பல்டி அடித்து வேறு ஆளைத் தேடுகிறோம் என்று அறிவிக்கப் பட்டது. இடையில் என்ன தான் நடந்தது. யார் அவர் தேர்வாவதைத் தடுத்தது என்று ஒரு தகவலும் இல்லை. இதற்கிடையில் திடீரென்று கிரகாம் போர்டு தகுதியானவர் என்று அறிவிக்கப் பட்டார். வீரர்களுக்கும் அவர் தேர்வு திருப்தியைத்தரும் என்று செய்திகள் வந்தன. இன்னும் ஒருவர் கூட உள்ளார் ஆனால் அவர் பெயர் தெரியாது (??!!!) என்று அறிவித்தார்கள். அந்த இன்னொருவர் ரணதுங்காதான், வெங்கட்ராகவன் தான், இவர்தான் அவர்தான் என்று எல்லாரும் ஊகங்களைக் கிளப்பிக்கொண்டிருக்க நான்தான் அவன் என்று சொன்னார் ஜான் எம்புரே. முன்பு இந்திய வீரர்கள் வெளுத்துக் கட்டிய, பயிற்சியளிப்பதில் சர்வதேச அனுபவம் இல்லாத இவரையெல்லாம் ஏன் கொண்டுவருகிறார்கள் என்று ரசிகர்கள் நொந்து கொண்டிருக்க, இருவரிடமும் நேர்காணல் நடத்தியது கிரிக்கெட் வாரியம். இதெல்லாம் சும்மா கண்துடைப்பு, போர்டு ஏற்கெனவே தேர்வு செய்யப்பட்டுவிட்டார் என்றும் செய்திகள் வந்தன. நேர்காணல் முடிந்ததும் போர்டு தேர்வானர் என்று உடனே அறிவித்தனர் BCCI அதிகாரிகள். அம்மாடி ஒரு வேலை முடிந்தது என்று எல்லோரும் பெருமூச்சு விட்ட வேளையில், எல்லார் முகத்திலும் கரியைப் பூசும் விதமாக இந்த வேலை வேண்டாம் என்று போர்டு அறிவித்ததாக அவர் வேலை பார்த்துக் கொண்டிருக்கும் Kent அறிவித்தது. அடியைப் பிடிடா பாரத பட்டா என்று பயிற்சியாளர் தேர்வை மீண்டும் துவக்க வேண்டிய கட்டாயம் கிரிக்கெட் போர்டுக்கு. கடினமான இங்கிலாந்து பயணம் 10 நாட்களில் இருக்கும் நிலையில் கிரிக்கெட் வீரர்கள் முதல் ரசிகர்கள் வரை எல்லாரிடமும் குழப்பமோ குழப்பம். இந்த தேர்வை உலகக் கோப்பை முடிந்து நிதானமாக இவ்வளவு நாள் கழித்து நடத்த வேண்டிய தேவை என்ன ? ஏன் இன்னும் பலரை அழைக்கவில்லை ? இந்தியாவில் திறமையான பயிற்சியாளர் இல்லையா ? பயிற்சியாளர் தேர்வில் வீரர்களின் தலையீடு எந்த அளவில் இருந்தது ? இன்னும் பல கேள்விகள் ரசிகர்களின் மனதில் எழுகின்றன.

மந்திரி குமாரி - விமர்சனம்

டிஸ்கி
ஹி ஹி..... விமர்சனம் புதுப் படத்துக்குத் தானா எழுதனும். பழைய படங்களை ரீமேக் பண்ணுவது போல இது ஒரு விமர்சன ரீமேக். அம்புட்டுத்தேன்.


நேற்று படத்தை (கலைஞரின் பிறந்தநாளை முன்னிட்டு ??!!) பொதிகை காண்பித்து புண்ணியம் தேடிக்கொண்டது. 50களுக்கே உரிய நடையானாலும் படத்தின் விறுவிறுப்புக்கு குறைவில்லை. குண்டலகேசி என்னும் காப்பியத்தை தழுவி அக்கால ஜாம்பவான்களில் ஒருவரான மாடர்ன் தியேட்டர்ஸ் சுந்தரம் எடுத்த படம். கதை என்னவோ பத்திரிகைகளில் வரும் ஒருபக்க கதைபோல தான். ராஜகுருவின் மகனே திருடர்களுக்கு தலைவராக இருந்து கொண்டு கொள்ளைத்தொழில் செய்து வருகிறான். தளபதி அவனைப் 'கையும் களவுமாக' பிடித்துக் கொடுத்தாலும் அவன் மேல் காதல் கொண்ட மந்திரியின் மகளின் சாமர்த்தியத்தால் அவன் தூக்குமேடையில் தண்டனை நிறைவேற்றப்படும் தருவாயில் விடுவிக்கப் படுகிறான் (அட இப்போ வரும் படங்களின் கிளைமேக்ஸ் இந்தப் படத்தின் நடுவிலேயே வருகிறது !!) பொய்க்குற்றம் சாற்றியதாக தளபதி நாடு கடத்தப் பட்டு மந்திரி மகன் திருடனுக்கு மணமுடிக்கப் படுகிறாள். தளபதிமேல் ஆசைப்படும் அரசகுமாரியும் அவனுடன் நாட்டைவிடு ஓடிப் போய்விடுகிறாள். பதவிக்கு ஆசைப் பட்டு ராஜகுரு அரசனைக் கொல்ல தீர்மானிக்கிறார். திருடனும் தன் 'பழைய தொழிலுக்கு திரும்பியது மட்டுமில்லாமல் தளபதியை தேடிப்பிடித்து அடித்துப் போட்டு அரசகுமாரியைத் தூக்கிவந்து அடைய நினைக்கிறான்

ராஜகுருவின் எண்ணம் நிறைவேறியதா ?

திருடனின் சதி மந்திரிகுமாரிக்கு தெரிந்ததா ? அவள் என்ன செய்தாள் ?

தளபதியும் அரசகுமாரியும் ஒன்று சேர்ந்தார்களா. விடையை வெள்ளித்திரையில் காண்க, என்று பாட்டுப் புத்தகங்களில் வருவதுபோல் போட ஆசைதான். ஆனால் இது த்ரீ மச் என்பதால் உங்களுக்கே முடிவு தெரியும் என்று முடித்துக்கொள்கிறேன்.

தளபதியாக வரும் எம்.ஜி.ராமச்சந்தர் (நம்ம வாத்தியாருதான்) அப் போதைய படங்களில் அதிகம் காணமுடியாத யதார்த்தமான நடிப்பை வெளிப்படுத்தியிருந்தார். இந்தப் படத்திற்காக தாடி வைக்கமுடியாது என்று அவர் அடம் பிடித்ததாகவும் சுற்றியுள்ளோர் அவரை கன்வின்ஸ் செய்ய படாத பாடு பட வேண்டியிருந்தது என்றும் கடைசியில் டி.ஆர். சுந்தரம் தாடி வைக்கவில்லையென்றால் ஆளை மாற்றுகிறேன் என்று சொன்னவுடன் ஒரு குறுந்தாடி வைத்துக் கொண்டு நடித்ததாகவும் தகவல். நம்பியார் வழக்கம் போல அற்புதமான வில்லத்தனதை வெளிப்படுத்தியிருந்தார். கலைஞரின் வசனம் அந்தக் கால நடையில் கலக்கல். 'அரண்மனை நாயே, அடக்கடா வாயை' என்பது போன்ற வித்தியாசமான நடை. திருட்டுக்கூட்டதில் ஒருவன் திடீர் தலைவர் பதவியை எடுத்துகொண்டு, நீ நிதி மந்திரி, நீ சமையல் மந்திரி, நீ யுத்த மந்திரி, நீ போக்குவரவு மந்திரி என்று எல்லாருக்கும் பதவி கொடுப்பது இப்போதுள்ள சூழ்நிலைக்கு எவ்வளவு பொருத்தம். 'வாராய் நீ வாராய்' போன்ற பாடல்களும் அருமை.

மொத்தத்தில் மந்திரிகுமாரி, பழமையில் புதுமை (அடங்கமாட்டியா நீ !!)

பி.கு. படம் பற்றிய சைடு தகவல்கள் நன்றி என் தாத்தா !!

சிவாஜி

புலி வருது கதையாக இருந்த புலி வரத்தான் போகிறது. ஜூன் 15 ரிலீசாம். படத்தை எடுத்தவர்களை விட தங்கள் படங்களை வெளியிடாமல் வட்டிகட்டிக் கொண்டிருக்கும் மற்ற தயாரிப்பாளர்களே நிம்மதிப் பெருமூச்சு விடுவார்கள்

யாருக்கு லாபம்

இதோ பிளஸ் டூ முடிவுகள் வந்துவிட்டன. முதலிடம் பெற்ற மாணவிகளுக்கு வழக்கம்போல இனிப்பு ஊட்டுவது, அவர்கள் நாங்கள் மருத்துவர், பொறியாளர் ஆகி நாட்டுக்கு சேவை செய்வோம் என்று முழங்குவது, அதை பத்திரிகைகளும் டீ வி சானல்களும் படம் பிடிப்பது போன்ற சம்பிரதாயங்கள் முடிந்தன. ஆனால் on the other side, தேர்வு எழுதி மருத்துவ, பொறியியல் கனவில் இருக்கும் பல்லாயிரக்கணக்கான மாணவர்கள் அதற்கான தேர்வு முறை இந்த வருடம் எப்படி இருக்கும் என்று (இதுவும் வழக்கம்போல்) குழப்பத்தில் ஆழ்ந்துள்ளனர். ஓரளவுக்கு புரியும் படி இருந்த நுழைவுத் தேர்வு முறையையும் ரத்து செய்து புண்ணியம் கட்டிக் கொண்டது அரசு. அதைச் செய்ய முக்கியமான காரணமாக அரசு தரப்பில் சொல்லப் பட்டது, நுழைவுத் தேர்வு முறை கிராமப் புற மாணவர்களுக்கு எதிராக உள்ளது என்பதாகும். நகர் புற மாணவர்களுக்கு கிடைக்கும் கோச்சிங் கிராமப் புறத்தில் இல்லை என்பாதாலேயே அவர்கள் தொழில்நுட்ப கல்லூரிகளுக்கு தேர்வு ஆவதில்லை என்பது ஒரு வாதம்.

இப்போது புதிய முறையாக அரசு அறிவித்திருப்பதைப் பார்ப்போம். இயற்பியல், வேதியியல் மற்றும் கணிதம் ஆகியவையின் கூட்டுத்தொகை கொண்டே ஒருவரின் தகுதி நிர்ணயம் செய்யப் படும். கூட்டுத்தொகை சமமாக இருந்தால், கணிதப் பாட மதிப்பெண்கள் அடிப்படையில் rank தீர்மானிக்கப் படும், அது சமமாக இருந்தால், இயல்பியல் மற்றும் வேதியியம் மதிப்பெண்கள் முறையே rank ஐ தீர்மானிக்கும். இது வரைக்கும் ஓ கே. ஆனால் எல்லாமே சரி சமமாக இருந்தான் rank செய்வது எப்படி. வயது (??!!) அடிப்படையில் தேர்வு செய்வோம் என்று அரசு சொல்கிறது. அதுவும் ஒன்றாக இருந்து விட்டால் ? குலுக்கல் முறையில் தேர்வு நடக்குமாம். ஒன்றுக்கு மேற்ப்பட்டோ ர் சரியான விடை எழுதியிருந்தால் குலுக்கல் முறையில் பரிசு வழங்கப்படும் என்று பத்திரிகைகளில் வரும் போட்டிகளுக்கும் இத்தகைய முறைக்கும் வித்தியாசம் இருப்பதாக எனக்கு தெரியவில்லை. நாட்டின் முதுகெலும்பாக விளங்கிவரும் தொழில் நுட்பப் படிப்புக்கும் உயிர்காக்கும் துறையான மருத்துவப் படிப்புக்கும் குலுக்கல் முறையிலா தேர்வு ? அதன் நம்பகத்தன்மை என்ன. பெற்றோர்கள் முன் எழுந்து நிற்கும் கேள்விகள் இவை.

மதிப்பெண்கள் ஒன்றாக இருந்தால் தானே இந்தக் குழப்பம் என்று கேட்பவர்களுக்கு. இந்த ஆண்டுத் தேர்வில் கணித்தில் 1568 பேரும், இயற்பியலில் 217 பேரும், வேதியியலில் 147 பேரும் 200க்கு 200 வாங்கியுள்ளனர். இவர்களிலேயே 1000 பேருக்கு மேல் சமமான மதிப்பெண் வரும் என்று அனுமானிக்கப்படுகிறது. இதைத் தவிர 199 , 198 ... எடுத்தவர்களில் சமமான மதிப்பெண் பெறுவோர் எத்தனையோ. ஆகக் கூடி வயது / குலுக்கல் அடிப்படையே பெரும்பாலானோரைத் தேர்வு செய்ய அமையப் போகிறது என்பது பெற்றோர்களின் (நியாயமான) கவலை.

சரி நுழைவுத் தேர்வுக்கு ரத்துக்கு முக்கியமான காரணமான கிராமப் புற மாணவர்களின் பிரநிதித்துவத்தை இப் புதிய முறை அதிகரிக்கப் போகிறதா என்று பார்த்தால் ஏமாற்றமே மிஞ்சுகிறது. அதிக மதிப்பெண் பெற்ற பெரும்பாலான மாணவர்கள் நகரங்களிலிருந்து வந்தவர்களே. ஒரே விதிவிலக்கு நாமக்கல் / ராசிபுரம் பகுதிகளிலுள்ள boarding பள்ளிகள். ஆனால் அந்தப் பள்ளிகள் அதிக மதிப்பெண் பெறவே பயிற்சி கொடுப்பவை. ஆக மற்ற rural பகுதிகளில் 190 க்கும் அதிகமான மதிப்பெண் பெற்றோரின் எண்ணிக்கை மிக குறைவு. ஆக இம்முறையும் நகர்புற மாணவர்களே தொழில் நுட்பக் கல்வியில் தேர்வு பெறும் வாய்ப்பை அதிகமாக பெறுகிறார்கள். கடைசியில் நுழைவுத் தேர்வு ரத்தால் பயன் பெறுவோர் சொந்தப் பெயரிலும் பினாமி பெயரிலும் கல்லூரிகள் நடத்திவரும் 'பெரிய' மனிதர்கள்தாம். இம்முறை அவர்களை மேலும் கோடீஸ்வரர்களாக்கும் என்பதில் ஐயமில்லை.

ஒருவனுக்கு மீனைக் கொடுப்பதை விட மீன் பிடிக்க கற்றுக்கொடுப்பது மேல் என்ற உண்மையை மனதில் கொண்டு கிராமப் புரங்களிலும் தரமான் பள்ளிகள் அமைப்பதும் நுழைவுத்தேர்வுக்கு தரமான் பயிற்சியகங்களை அரசே நடத்துவதும் தான் கிராமப் புற மாணவர்களை முன்னுக்கு கொண்டு வருமே தவிர, இத்தகைய தேர்வுமுறை மாற்றங்கள் யாருக்கும் நன்மை தரப் போவதில்லை. ஆனால் can we expect such sane things from Govt. ?